Gora eta gora doa Ane Iturria mendi korrikalari tolosarra. Azken egunotan Italiako Apeninoetan lehiatu da, Espainiako selekzioarekin, jubenil mailako skyrunning munduko txapelketan, eta txapeldunorde suertatu da: 21,6 kilometroko eta 2.226 metro desnibel positibodun ibilbidea 3 ordu eta 17 minutuan osatu du.
Bi egun lehenago, kilometro bertikaleko proba izan zuten kirolari gazteek, eta hitzordu hartan ere fin ibili zen Iturria tolosarra: Gran Sasso mendia (2.912 m) 53 minutu eta 27 segundoan igo zuen. 3,5 kilometroko bidea zen egin beharrekoa, eta 1.000 metroko desnibel positiboa zuten.