[BABESTUTAKO EDUKIA] Pintxo ibilbidea: Ama batek bezala

Ahal dela, garaiko produktuak aukeratu eta haiekin egiten dituzte pintxoak. Guztiak sukaldetik ateratzen dira, hotzak nahiz beroak izan. Gainera, hiru hilabetez behin pintxoen aukera aldatzen saiatzen dira, eta kartaz kanpo, momentuko produktuekin egindako pintxoak eta errazioak ere edukitzen dituzte: «Bogabantea hoberenean dago oraintxe, tomateak ere hasten ari dira, xixa horiak, olagarroa...», azaldu du Ricok. Horiek lortzeko, bertako harategi eta arrandegietakoekin lan egiten dute.

Pintxoez aparte, errazioak ere badauzkate. Horien osagaiak ere, ahal dela, garaikoak eta bertakoak izaten dira, eta ezin bada, hornitzaileak behintzat hemengoak izaten dira. «Guk hori defenditzen dugu». Errazioetan ere eskaintza zabala daukate: «Abakandoa, olagarroa, laster atuna hasiko da, orain arte topera ibili gara xixekin, onddoak dauzkagu, zainzuri freskoak izugarriak dira...», dio Ricok. Egunero aldatzen den karta ere badaukate, dagoen haragiaren, arrainaren eta barazkien arabera.

AMAtik jendeari gehien gustatzen zaiona modu informal batean kalitatezko produktuak dastatzeko aukera da. «AMAko bezeroek produktuen kalitateari nahiz guk beraiekiko daukagun gertutasunari garrantzi eta balio handia ematen diete».