Uztailean eta abuztuan ez du saiorik egingo Galtzaundiren irakurle taldeak. Irailaren 25ean, asteazkena, itzuliko da berriz hilabeteroko martxara. Udan, beraz, irakurtzeko proposamena finkatu dute dagoeneko: Josu Zabaletak itzulitako Pier Paolo Pasolini zinema-zuzendari, olerkari eta idazle italiarraren Gauza baten ametsa eleberria. Tolosako kultur etxean izango da saioa, 19:00etatik aurrera, eta Yurre Ugartek dinamizatuko du.
Eleberriko historia 1948 eta 1949 urteetan gertatzen da, De Gasperiren gobernuak lur jabeen eta partzuerren arteko harremanetan justizia gehiago ezartzeko legea emanik, Italiako ipar-ekialdeko Friul eskualdeko lur jabeek lege hura bete zezaten laborariek egin beharreko greba eta borroka luzeen garaian. Hain zuzen ere, Pasolinik 1949-1950 bitartean idatzi zuen bere lehen eleberri argitaratua izan zuen hau, jaioterritzat zeukan Friuletik Erromara ia ihesian aldatu berria zela. Josu Zabaleta legazpiar itzultzaile eta idazleak, bi aldiz jaso du Itzulpengintzako Euskadi Saria: 2001ean eta 2008an. 2013an Espainiako Itzulpengintzako Sari Nazionala eman zioten. Sari horiez gain, 2006an euskaltzain urgazle izendatu zuten.