Superheroien I. Topaketa
Energia aurreztea edota aurrezten ikastea helburu duen kanpaina martxoan jarri zuten martxan, eta ostiralean eman zioten amaiera Superheroien I. Topaketarekin, Tolosan. Tolosaldea Garatzenek eskualdera begira Abaltzisketan aurkeztu zuen egitasmoa, txikienei begirakoa izan da. Hori dela eta, Ingurumenaren Nazioarteko Egunaren harira, eskualdeko gaztetxoentzat antolatu zuten topaketa Zumardiaundian. Superheroiek ginkana eta jolasak egin zituzten, Intujairen eskutik. Izpi superheroia izan zuten laguntzaile. Jarraian, Superheroien merendola egin zuten, eta argazki batekin amaitu zuten Energiaren superheroien festa.
Osasuna Kalean kanpaina
Tolosako Asuncion klinikak, bertako Assumptio Proinnova fundazioaren bitartez, Osasuna kalean kanpaina jarri berri du martxan. Zerkausian egingo diren 4 hitzaldiz eta tailerrez betetako ekimena da, eta lehen saioa, astelehenean izan zen. Gainerakoak, ekainaren 20an, eta uztailaren 4ean eta 11n izango dira. «Helburua, osasunaren gaia kalera gerturatzea da. Espezialisten ohiko saioei, aire dinamikoago bat emango die, bide batez, ohitura osasuntsuei edo egunerokoan eragina duten gaiak landuz», azaldu du Regina Martinez klinikako komunikazio arduradunak.