Asteburuan ospatu den Tolosandblues jaialdiaren balorazio «positiboa» egin du Tolosako Udalak. Lau egunez nazioarteko blues talde ospetsuak aritu dira kontzertuak eskaintzen Tolosako txoko ezberdinetan, eta udaletik azaldu dutenez, «aurtengo taldeen maila aparta izan da».
Blues-rock, piano boogie, country-blues, soul, Kaliforniako zein Chicagoko blues estiloak entzuteko aukera izan da. Aukera zabal horrek, arrakasta eragin duela diote: «Aurreko urteekin alderatuz, askoz jende gehiago hurbildu da kontzertuetara».
Jaialdia «guztiz egonkortuta eta osasuntsu» dagoela azaldu dute, «geroz eta oihartzun handiagoa dauka bai Tolosatik eta baita Euskal Herritik kanpo ere».
Tolosan blues doinuak jotzen aritu diren artisten sentsazioen berri ere eman dute. Esan dutenez, «oso gustura aritu omen dira herrian dagoen blues giroarekin, eta , orokorrean, jaialdiarekin».