Igandean jokatu ziren San Joan Txapelketako finalak, lau eta erdian. Hiru partidak ikusgarriak izan ziren eta pilotazaleak ederki gozatu zuen Beotibarren.
Jubeniletan Gutierrezek 22-13 irabazi zion De La Fuenteri. Errioxarra indartsu sartu zen finalean, 11-4 aurreratuz. Nafarraren jokoa eta kalitatea esnatu zen orduan, eta finala iraultzeko punttuan izan zen, 15-13 gerturatuz. Hortik aurrera zortea eta tantoak Gutierrezen alde izan ziren, zuzenean 22ra iritsiz.
Etorkizun mailako partidan Julen Alberdik 22-13 irabazi zion Arribillagari. Finalik argiena izan zen joko aldetik. Alberdi maisu dabil eta igandean hori ikusi zen.
Nagusien mailako finala ikusgarria izan zen: markagailuan eta jokoan. 22-21 irabazi zuen Espinalek, baina hori gutxienekoa izan zen pilotazaleentzat. Bi finalistek ikuskizun handia eskaini zuten. Partida amaierako txalo zaparradak hori islatu zuen. Markagailuan jauzi handiak eman zituen lehian zehar. Adibidez, Zubizarreta 14-10 jarri zen aurretik, ondoren, 21-15 galtzera pasatzeko. Hortik 21nako berdinketa, eta Espinalen garaipena etorri ziren.