Elizako kanpaiek gaueko hamarrak jo bezain pronto piztu dute San Joan sua. Aldi berean, musika bandak San Joan zortzikoa ere jo du. Olatz Peonek lizar puska bat bota du sutara eta ordutik aurrera udaleko kideek nahiz herritarrek izan dute aukera suaren gainetik jauzi egiteko. Dozenaka animatu dira eta giro bikaina sortu da Andre Maria plazan.
Behin sua itzalita, Udaberri dantza taldekoak igo dira oholtzara. Bertan hainbat dantza egin dituzte, beteta zegoen plazaren aurrean. San Joan bezperari amaiera emateko, Tolosako Hodeitzar abesbatzak eskainitako abestiekin gozatzeko aukera ere izan dute bertaratutakoek.