Tolosaldeko mendi lasterketa egiteko aukerarik ez du izan asteburuan Ane Iturriak, Granadan izan baita Espainiako Kopa lehiatzen. La Sagra Skyrace mendi lasterketan parte hartu zuen Alpino Uzturreko korrikalariak, igandean. Bidaia ez zen alferrikakoa izan, garaipenarekin itzuliko baita etxera Iturria. 15 kilometro egiteko 2:06:00 behar izan zituen, hau da, kilometroak 8 minutu eta 24 segundoko erritmoan egin zituen. Lasterketa bere osotasunean kontuan hartuta, helmugan 19.a izan zen tolosarra. Bigarren emakume juniorrari 14 minutuko aldea atera zion, eta hirugarrenari 16koa.