Tolosako kultur etxeko Tic-Tac antzerki tailerrak ikasturtea biribilduko du gaur. 26 lagunek osatu dute tailerra, 2018-19 ikasturtean. Askotarikoa da taldea, gazte zein heldu, eta horrexek egiten du, taldekideen hitzetan, bidaia hau «errealago eta aberatsago».
Elena Aranbarri antzerki tailerraren zuzendariak azaldu duenez, izaeradun emakumeen mapa eratzen duen mosaikoz dago osatua, Txuri antzezlana: «Indar handiarekin bizitzari aurre egin zioten emakumeak, garai ezberdinetara bikaintasunez egokituz. Umorez beteriko emakumeen istorioa da. Bertute handi hori, biziraupenaren parte dena, bizitzarena, min guztien sendatzea da».
Txuri izenburuarekin bat datorren eszenaratzea prestatu dute: «Jendeak beste toki batera bidaiatuko lukeenaren sentsazioa helarazi nahi dugu; planeta ezberdin bat, non hainbat eta hainbat gertakari ezberdin jazotzen diren». Aranbarrik azaldu duenez, «agertokian emakume abaniko zabala ikusiko da, bizipen ezberdinak, bitxikeriak, irri zein minak. Antzerki taldearen ispilu da, gure aniztasunaren isla. Talde lana eta ilusio ikaragarria jarri dugu». Antzezlana euskaraz zein gazteleraz eskainiko dute.
Leidor aretoan, gaur, 20:30ean, Alfredo Sanzolen Delicadas antzezlanaren 'Txuri' egokitzapena eskainiko dute.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!