Urteetan egin duten moduan, meza nagusian San Isidrori aurtengo uzta zaintzeko eskatu diote. Ia ordubeteko mezaren ostean, zain zituzten bertsolariak eta trikitilariak. Jendea mezetatik ateratzearekin batera, kanpoan zain zituztenek, festari hasiera emateko bi suziri bota dituzte airera.
Elizatik egin den prozesiorik jendetsuena, Artubi elkarterako bidean egindakoa izan da. Elkarteraino Aiora Beloki eta Eider Zubillagaren trikiti doinuei, Mendik jarri die pandero hotsa. Bidezidorra hartu duenik ere izan da, eta mahaian eserita itxaron diete gainerakoei. Hamaiketako ederra egiteko mahaiak zain zituzten prest jarrita. Mikel Artola eta Unai Mendizabal Mendi bertsolariek saio txiki bat egin ostean, saldaz, haragi egosiaz eta txorizoz bete dituzte, tripak, kontu kontari. Elkarteko kideek mimoz zaindu dituzte bertaratutakoak, eta jan beharrekoak janda, trikiti doinuak eta bertsoak izan dituzte entzungai.
Elkartetik metro gutxiko bidean, bazkaria egin dute Abaetxe jatetxean, eta goizeko bideari jarraituz, bapo bazkaldu eta gero, trikiti doinuez eta bertsoez gozatzeko aukera izan dute.
Arratsalde pasa ederra egin ostean, egunari jarraipena eman nahi izan dionak, aukera izango du, Artubi elkarterako prozesioa eginez. Afaria egingo dute bedaiotarrek eta, horrenbestez, aurtengoarekin ere, uxatu dituzte eguraldi txarrak.
Uzta onik ez da faltako, beraz, Bedaioko baserri eta etxeetan.
Eguzkiak egin die lehen harrera, gaur, bedaiotarrei, eta Harri Jaia eguna izaki, aurtengo uzta babesteko eskaera ere egina dute. Harri Jaia usadio zaharrari bikain eutsiz ospatzen dute Bedaion.
Erlazionatuak
Bedaioko Harri Jaia eguna
2019 eka 06 Tolosa
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!