Ekosferaren azken uhinak

Euskadi Irratian, astean behin Jokin Aldazabal kazetariak gidatzen duen Ekosfera saioaren amaiera festa ospatu dute, gaur, Tolosan. Goizean, bisita gidatuak egin dituzte, kultur etxean hitzaldi ezberdinak entzuteko bildu aurretik.

"Ez dago beste arrazoirik. Ikasturtea amaitzean, erretiroa hartuko dut, eta beraz, ez dut irratsaioarekin jarraituko", adierazi du Jokin Aldazabal kazetariak, kultur etxean hitzaldi saioarekin hasi baino lehen. Ondorioz, 9 urteren ondoren, ingurumenaz eta hausnarketaz aritzen diren kolaboratzaileekin batera esan die agur irrati uhinei.

Goizean hasi da gaurko ekosfera eguna, bi bisita gidaturekin. Batetik, eta Mikel Olanoren laguntzaz, Elosegi parkean zehar ibili eta txoriak entzuteko aukera izan dute 15 bat lagunek. Bestetik, Brian Cullem Tolosaldea Tour-eko gidak, alde zaharraren historia eta bitxikeriak azaldu dizkiete bertaratu direnei.

Ondoren, kultur etxean elkartu dira. Guztira, 20 bat lagunek entzun dituzte irratsaioko kolaboratzaileek eskainitako hitzaldiak. Ekologiaz, Arantxa Txintxurreta aritu da: Kristina Zuza, berriz, Fisikaz; Kimikaz aritzeko, Josu Lopez-Gazpio tolosarrak hartu du hitza. Azkenik, Aitziber Sarobe ingurumenaz hitz egin du, eta Ortzi Akizuk, kontsumoaz.

Hasieran eta amaieran, zuzeneko musika izan dute Mariaje Rekondo, Amaia Lizaso eta Amaia Arostegiren eskutik. Musikariek, irratsaioko sintoniak zuzenean interpretatu dituzte. Azkenik, antzerki obra bat izan dute kultur etxean, taldeko argazkia atera eta bazkaltzeko elkartu aurretik.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!