Ilara luzeak osatu dira, gaur eguerdian, Euskal Herria plazan egin den HARAGI festan. Bertaratutakoek aukera izan dute Carolina Carriel eta Isidora Diaz txiletarrek prestatutako arkumea makil erara bizigarri txiletarrekin eta Txomin Parrilaren saiheski keztatua parrilan dastatzeko. Txiletarrek hamabi arkume prestatu dituzte, eta horretarako, goizeko 5:30erako hasi dira lanean. Euskaldunek, aldiz, bertako txekorraren saiheskia prestatu dute. Arduradunak adierazi duenez, jendeak oso ondo hartu du prestatu dutena. "Atzo teknika berezi batekin egin genuen, baina gaur betiko eran ari gara, parrilan", gaineratu du.
Dastaketaren ondoren, bazkaltzeko aukera ere egon da. Horretarako, Txuleta menua prestatu dute Tolosako lau erretegietako parrileroek eta nazioarteko gonbidatuek.
Jendea oso gustura
Sukaldariek kozinatutakoarekin gozatzeko aukera izan dute Euskal Herria plazara hurbildu diren herritarrek. Laida Altunak azaldu du txiletar erara prestatutako arkumea ari dela jaten eta oso goxoa dagoela. "Txilen bizitzen egon ginen eta han probatzeko aukera ere eduki genuen. Egia esan, asko gustatu zaigu". Gaineratu du Txileko lagun batzuekin daudela eta beraiek ere oniritzia eman diotela. Ez da HARAGIra etortzen diren lehen aldia, urtero koadrilako plana egiten dutelako egun honetan. Imanol Yarzarentzat, berriz, tolosarra izan arren, lehenengo aldia izan da HARAGIn. Saiheskia pikiloko piperrekin jaten ari da eta gustura dago. "Esperientzi polita izaten ari da eta giro atsegina dago", gaineratu du. Tolosako jendea ez ezik, urrunagotik etorritakorik ere badago. Horren adibide da Lasarte-Oriako Asier Garcia. Interneten ikusi zuten HARAGIren eskaintza eta gerturatzea erabaki zuten. "Arkumea jaten ari gara eta oso ona dagoela iruditzen zaigu", dio. Gaineratu du zalantzarik gabe errepikatzeko moduko esperientzia dela. Jon Mikel Castillo ere ados dago baieztapen horrekin. Bera bildotsa jaten ari da eta oso goxoa dagoela baieztatu du. "Atzo bueltatxo bat ematera etorri ginen, eta izugarrizko giroa zegoenez, gaur denborarekin etortzea pentsatu dugu", azaldu du Castillok. Guztiak gustura, beraz, HARAGIren eskaintzarekin.