'Gizartea hobera aldatzen' erakusketa zabaldu du Atzegik, adimen desgaitasuna duten pertsonak hobeto ezagutzeko aukera emateko. Horretarako, Ibarrako Garaguneko erabiltzaileen argazkiak daude ikusgai, besteak beste.
Erakusketa lau zatitan dago banatuta. Batetik, Atzegik bere ibilbide zehar egindako kartelak bildu dituzte, horrela, «elkartearen historia eta gizartearen eraldaketa» ikusi ahal izateko.
Bestetik, Jon Andoni Martin argazkilari eta artista azkoitiarraren Begirada Garbiak lana ere bertan dago. Horrez gain, hainbat argazki eta lan ere jarri dituzte aisialdi taldeekin batera jorratzen duten Txolarte programari buruzkoak.
Azkenik, Ibarrako Goienetxe fundazioaren Garaguneko erabiltzaileen argazkiak ere badaude ikusgai, horiek hobeto ezagutzeko aukera emanaz.