Golak, poza eta festa. Horiek izan dira nagusi Berazubin Tolosa CF-en eta Zarautzen artean jokatu duten partidan. Harmailak zalez bete dira eta lortu dute helburua: Bigarren Mailara igo dira. Jardunaldi baten faltan, lau puntu atera dizkiote bigarren sailkatuta dagoen Arratiari, eta Euskal Ligako txapeldunak izango dira. Behin helburua lortuta, ospakizunak eta festa giroa nagusitu dira. Zaleek klubak egindako eskariari erantzun diote eta Berazubiko harmailak bete dituzte.
Partida hasi den momentutik izan da nagusi Tolosa CF. Aukerak izan badituzte ere, lehen zatian ez dute golik sartu eta 0-0 emaitzarekin joan dira aldageletara. Bigarren zatian, indartsu sartu dira zelaira Tolosa CF-eko emakumeak eta golak bata bestearen atzetik etorri dira. Izaro Goenagak sartu du lehenengoa eta Ainhoa Bengoetxeak 2 eta 0ekoa egin du handik gutxira. Eider Tejeriak sartu du partida erabakita utzi duen hirugarren gola. Izaro Goenagak eta Maddi Garikanok egindako gol banaren ondoren, festan murgildu dira Tolosa CF-eko lehen taldeko emakumeak eta harmailetan bildu diren zaleak.
