Atzo gaueko hamarrak ondoren Ertzaintzak abisua jaso zuen Tolosako Plaza Zaharrean borroka bat izaten ari zela. Ertzainak bertaratu zirenean, bi anaiek “indarkeria bidezko lapurreta” jasan zutela ikusi zuten. Bi anaiek Ertzaintzari azaldu ziotenez, beraietako bati atzetik kolpatu zioten buruan, eta praken atzealdeko poltsikoan zuen mugikorra kentzen saiatu ziren. Ondoren, Ertzaintzaren oharrak zehazten duenez, bi edo hiru pertsona erasotzen hasi zitzaien anaiei, eta bietako bat lurrera bota eta bertan ere kolpatzen jarraitu zuten. Azken hau Asuncion klinikara eraman behar izan zuten belaunean eta aldakan zituen lesioengatik.
Plaza Zaharrean bertan Ertzaintzak “erasotzaileetako bat” atxilotu zuen, “eta beste bat bizikletan saiatu zen alde egiten”. Inguruan harrapatu zuten ertzainek, eta hauetako bati aurpegian jo zion buruarekin, oharrak dioenez. Atxilotua izan zen hori ere, eta atentatu delitua ere leporatu diote. Horrez gain, bizikleta konfiskatu zioten, eta Ertzaintza ikertzen ari da berea den edo lapurtua izan den.
Bi atxilotuek aurrekari polizialak dituztela azaldu dute Ertzaintzatik. Gaur goizean epaitegira eraman dituzte biak.