Tolobolei Bide Bide taldeak lehen denboraldia burutu du pistako boleibolean. Aurreko denboraldian, 2016/2017koan, gaur egun taldeko jokalariak astean behin entrenatzen hasi ziren, pistako boleibol teknika lantzeko helburuarekin, hondartzako boleibolekoaren oso desberdina dena.
Hortik abiatuta, eta pare bat partidu dagoeneko lehiatzen ari zen talde baten aurka jokatu ondoren, nesken taldea sortzea egingarria zela ondorioztatu zuten. Babesleak eta konpromisoa hartuko luketen jokalari bila hasi ziren. Horrela, hasiera eman zioten proiektuari, Ametsak egi bihurtu lelopean.
Toloboleik antolatzen duen udako hondartza txapelketan, taldea osatzen zuten kideak aurkeztu ziren: Amaia Pagola, Yera Leon, Monica Colomo, Saioa Iparragirre, Idoia Lahidalga, Ane Arana, Ainhoa Martinez, Leire Uranga, Maria Lasa, Alaitz Zabala, Katiana De Sousa, Nagore Valles, Nagore Esnaola eta Eligio Rodriguez entrenatzailea, Bide Bide eta Bellmer babesle nagusiekin batera. Ondoren, abenduan, izandako zenbait bajen ondorioz, bi jokalari berri gehitu ziren taldera: Enara Garmendia eta Eider Nuñez.
Ligari dagokionez, Euskal Ligako bigarren maila, parekatua izan da oso, nahiz eta Astillero eta Ibararte taldeak nabarmendu diren. Horren erakusle da, Tolobolei Bide Bide taldeak behin gutxienez irabazi diola talde bakoitzari, aurrez aipatutako bi horiei izan ezik. Liga 6. amaituta, guztira 16 garaipen eta 10 porrot erdietsi dituzte. «Esan beharra dago, ez dela erraza izan, denboraldi osoan zehar hainbat baja izanda, guztira, deskantsurik gabe 26 partidu jokatu baititugu Santanderren, Bilbon, Gasteizen eta Nafarroan», azaldu dute taldetik. «Dena den, zalantzarik gabe, denboraldiaren balantzea positiboa da astean hiru ordu bakarrik entrenatu ditugula kontutan hartuta, entrenamendu bakarra eginaz partiduak jokatzen ditugun kantxan. Hori, Tolosan dagoen pista desberdinen eskari altua dela eta gertatu da, noski».
Tolobolei taldeak eskerrak eman dizkie, hasteko, babesle guztiei: «Izan ere, horiek gabe ez litzateke posible izango proiektu hau aurrera eramatea. Eskerrak eman baita ere, txoko guztietara jarraitu eta etenik gabe animatu gaituzten zaletu guztiei».
Aurrera begira, taldetik deialdia egin diete «boleibolean jolasteko interesa duten emakume konprometitu eta ilusioa duten orori, martxan den amets hau amaitu ez dadin Tolosan».