Inongo arazorik gabe, eta bestelako ezustekorik gabe eraman zen aurrera, Tolosako Udaletxean, apirileko osoko bilkura. Gobernuko nahiz oposizioko kideek, aho batez onartu zuten ‘Tolosaldeko Emakumeen Etxea’ proiektua gauzatzeko Asanblada Feministak aurkeztutako mozioa. Horrela, udalak, emakumeentzako erreferente den gunea eraikitzeari bidea ireki, eta politika feministen ideiak bultzatzeko konpromisoa hartu du.
Ikasteko, eztabaidatzeko eta herriko parte hartze sozio-politikoaren prozesua abiarazteko gunea izango da. Norbanako nahiz taldeen kezkak eta pentsamenduak bilduko ditu, indarkeria matxista, aborto eskubidea edota autodefentsa gaietatik abiatuz. Horrez gain, aholkularitza juridikoa eta psikologikoa, eta liburutegia ere izango ditu. Lekua erabakitzeko dago, baina ziurrenik Emakumeen plazako eraikin berrituan izango da.
Bi fasetan gauzatu da eskualde osoko ikuspegia hartzen ari den proiektua. Batetik, helburuak eta ezaugarriak zehaztu ziren, eta gero, etxearen zerbitzuak eta erabilera finkatu ziren. Udaleko ordezkariek, parte hartu duten eskualdeko 104 emakumeen konpromezua eskertu zuten, batez ere, Elhuyar-eko langileena.
Apustu etxeak lekualdatzea
Bestetik, Podemos-Ahal Dugu alderdiak, apustu etxeen inguruko mozioa aurkeztu zuen, hauek kultur eta hezkuntza zentroen ingurutik lekualdatzeko eskatuz. Udaleko ordezkariek, baina, mozio hura moldatu, eta berri bat onartu zuten, aho batez.
Lekuz aldatzeaz gain, kirol apustuen inguruko publizitate kopurua murrizteko eta udaltzaingoak arautegia kontrolatzeko konpromezua hartu zen. Iñaki Irazabalbeitia EH Bilduko ordezkariak, ludopatia kasuen inguruko kezka azaldu zuen, «gazteengan, geroz eta eragin handiagoa duen arazoa delako».
UDATE eta musika eskola
Udalak, 2018ko abenduan UDATE Herriatarren Arreta Zerbitzua arautzen duen behin-behineko ordenantza onartu zuen. Azken osoko bilkuran, behin-betikoz onartu zen. Une honetan, eraberritze lanetan jarraitzen dute zerbitzu horretan, berandu baino lehen, herritarren eta administrarien arteko harremana hobetuko baitu, udal jarduera gehienak herriko puntu bakarrean egin ahal izango direlako. Bestetik, bertako langileen lanpostuen behin-behineko balorazioa onartu zuen udalak, dagokion lanpostu zerrendaren aldaketarekin. Hala ere, maiatzeko bilkuran lantzea adostu zuten.
Eduardo Mocoroa Udal Musika Eskolako irakasleen hiru urteko lan hitzarmena barne hartzea ere erabaki zen. Musika eskolan kontratatuak izateko baldintza berak bete behar dituzten langileek, zeregin berdinak betetzen dituztenek, eta udaleko lanpostuen zerrendako lanpostu berdinak betetzen dituztenek, araubide ezberdinak zituzten lehen. Orain, berdindu egin dira, lan baldintzak homogeneizatuz eta antzinatasuna eguneratuz.
Erabaki hori hartu aurreko kudeaketa, ordea, «desegokia» izan zela adierazi zuen Lore Agirre EH Bilduko zinegotziak, oposizioaren izenean. «Batzordera deitzeko eta hura antolatzeko moduengatik kezkatuta gaude. Erabakiak, azken orduan hartu dira». Alkateak, «lanean aritzeko beste biderik ez zela» erantzun zion, aldi berean, akatsa onartuz.
Galderen eta eskaeren txandan, Kristina Pelaez EH Bilduko kideak, Ficobako azokak iragartzen zituzten kartelak herriko zenbait gunetan jartzearen inguruko kezka azaldu zuen, «bertako komertzioei eragiten zietelako». Nerea Letamendia azoketako zinegotziak, egoeraz jabetuta, kartelak jarri zituen enpresari espediente bat zabaldu zitzaiola adierazi zuen. Horrez gain, beste behin ere, Asuncion Klinikaren inguruko kexak izan ziren, kalitateagatik eta baldintzengatik.