11:00etan hasita, Tolosako Alde Zaharrean nahiz erdigunean ibili dira dantzari txikiak, euskararen doinu ezberdinak ahotan hartuta, eta Euskal Herriko dantza ezberdinetara lotuta. Udaberri dantza taldeko gaztetxoenekin batera, gonbidatutako taldeak honakoak izan dira: Arabatik Amurrioko Aiara, Bizkaitik Galdakaoko Andra Mari, Lapurditik Hendaiako Akelarre, Nafarroatik Iruñeko Muthiko Alaiak eta Berako Gure Txokoa, Nafarroa Beheretik Donibane Garaziko Garaztarrak eta Gipuzkoatik Errenteriako Ereintza eta Oiartzungo Haurtzaro.
Bazkalostean, 16:30ean, aurten lehenengo aldiz, emanaldi berezia egin dute dantza talde ezberdinetako gaztetxoek Plaza Berrian. Udaberri taldeko fanfarrearen laguntzaz aritu dira dantzariak.
Iluntzean erromeria
Dantzari Txikia amaituta, helduentzako euskal festa hasiko da, erromeriarekin. «Aurrez, fanfarrearekin batera, poteoa egingo dutePlaza Zaharretik abiatuta, 19:00etan. Gero, Zerkausian bilduko dira, lagun giroan afaltzeko, eta eguna borobiltzeko erromeria izango da Laiotz taldearen eskutik.