Haurren Hiria ekimenak mugikortasuna landu du aurtengo ikasturtean. Tolosako Laskorain Samaniego eta Herrikide ikastetxeetako Lehen Hezkuntzako 3. eta 6. maila arteko 43 haurrek osatu dute 2018-2019 ikasturteko Haurren Kontseilua.
Haurren Hiria politika publikoetan haurren parte hartzea sustatzen duen herri ekimena da eta urteko sei saioetatik lau egin dituzte dagoeneko. Haurrek, beraien esperientziak oinarri hartuta ondorioak atera eta hainbat neurri proposatu dituzte. Haurrek beraien desplazamenduetan dituzten arazo eta oztopoak identifikatu dituzte: bidegorriko markak ezabatuta egotea, espaloi estuak, zoru irregularrak...
Maiatzean amaituko dituzte saioak Mintzatxokoarekin eta Udalari urte osoko lanketen berri emango diote. Udala haurrek egindako proposamenak lantzen ari da Tolosa Badabil Mugikortasun Plana eratzeko prozesuaren bidez.