Berriro Zilarrezko Mailara itzultzeko aukera izango du Tolosa CF Eskubaloi taldeak. Asteburuan 41-22 irabazi zuten 26. jardunaldiko partida, Egiaren aurka. Bi puntu horiekin sailkapen nagusian 46 pilatu dituzte. Anaitasuna dago bigarren postuan, 44 punturekin. Hirugarren sailkatua Ereintza da, 35 punturekin. Lau jardunaldi falta dira denboraldia amaitzeko, hau da, 8 puntu gelditzen dira jokoan. Lehen bi sailkatuek igoera fasea jokatuko dute, eta kasu honetan, hirugarren sailkatua 11 puntura dagoenez, Tolosa CF igoera fasean egongo da. Maiatzaren 6an egingo da fase horretako zozketa. Lau taldeko ligaxkak sortuko dira, eta asteburu batean jokatuko dira partida guztiak, maiatzean bertan.