Tolosako Udala WWF World Wildlife Fund funtsak sustatutako 'Planetaren ordua' ekimenera batu da; aurten, 'Planetaren alde Jardun' lelopean. Hori dela eta, eraikin publikoen argiak itzaliko dira, aldaketa klimatikoaren aurkako aldarrikapen keinu gisa.
Argiak bihar itzaliko dituzte, 20:30etatik 21:30era, ondorengo eraikinetan: Udaletxea, Zerkausia, Eduardo Mocoroa musika eskola, kultur etxea, Errota, Usabal kiroldegia eta Berazubi kirolgunea.
Ingurumen departamentutik herritarrak ordubetez argiak itzaltzera gonbidatu dituzte, 20:30ak eta 21:30ak artean, honela klimaren alde lan egitearen kontzientzia sortuz.
Zortzi urte dira, mundu osoan milioika pertsona, enpresa, erakunde eta ikastetxe batzen direla aldaketa klimatikoaren aurkako 'Planetaren ordua' ekimena babestera. Guztira, aurten, 188 herrialdetako 8.000 hiri baino gehiagok hartuko dute parte.