Topic-eko Pedagogia Zuzendaria den Karmele Cruzen eskutik, txotxongiloak egiteko tailerra izan da, arratsaldean. Haurrek eta euren gurasoek hartu dute parte tailerrean, era guztietako txotxongiloak egiten: poltsa batean, hatz bateko txotxongiloak...
Nahi beste margo, paper eta elementu izan dituzte eskura. Hala ere, mezu garrantzitsu bat bota die Cruzek, bertaratutakoek, buru-belarri lanean jarraitzen zuten bitartean: "Gogoan izan, txotxongilo bat izan dadin, ezinbestekoa dela esku artean duzuen pertsonaia horri bizia ematea, hau da, berarekin jolas egitea". Cruzek, gainera, aurreko tailer batzuetan egindako txotxongiloak ere erakutsi dizkie.
Baina, ez hori bakarrik. Topic-eko kideek, Tolosako Ekinbide Etxeko ordezkariekin batera, egitarau zabala osatu dute gaur arratsalderako. 18:30ean, Txotxongiloen Nazioarteko Egunaren mezua irakurri dute eta, segidan, Valentziako La Negra konpainiaren En las nubes ikuskizunaz gozatzeko aukera izan da.
Amaitzeko, 19:15ean Topic-eko aldizkako erakusketa berria inauguratu dute, Herbeheretako Speeltheater Holland konpainiaren Eszenak & Istorioak izenekoa. Txotxongilo lan baten ikuspuntu orokor bat erakusten du, aretoan proposaturiko eszena eta egoerekin, nahiz txotxongiloekin. Luntxa ere izan da, bertaratu direnentzat.