Mendiko iraupen eskiak duen probarik luzeena da 50 kilometrotako bakarkako proba. Luzea bezain neketsua. Gaur, Austriako Seefeld herrian ospatzen ari diren Eskiko Munduko Txapelketen barruan, skating modalitateko proba jokatu da, eta bertan izan da Imanol Rojo tolosarra.
Hauxe, Rojok Munduko Txapelketan jokatu duen hirugarren eta azken proba izan da. Aurreko bietan, proba mixtoan eta 15 kilometrotako proba klasikoan, 41. eta 48. izan zen, hurrenez hurren. Hortaz, gaurkoa da tolosarrak Munduko Txapelketan inoiz lortu duen posturik onena.
Ibilbidea osatzeko, ia bi ordu behar izan ditu Rojok, eta irabazle, eta ondorioz munduko txapeldun izan den Hans Christer Holund norbegiarrarengandik 5 minutu eta lau segundora geratu da. Tartean, gainera, denbora galdu du, bastoi bat hautsi zaiolako.
Tolosarrak ez du bere helburu nagusia bete: probaren batean lehen 30 postuen artean sailkatzea. Hala ere, sare sozialetan adierazi duenez, oso pozik geratu da lortutako emaitzekin: "50 kilometro izugarriak. Gozatzen eta sufritzen. Lortutako emaitzarekin pozik. Gutxi falta izan du perfektua izateko. Lastima bastoiarena, baina horrelakoa da kirol hau. Eskerrik asko emandako babes eta animoengatik!".
