Azken asteetan, obrak gauzatzen ari dira Tolosako Asuncion klinikan. Asteburu honetan, baina, ondorioak utzi dituzte lanek. Izan ere, eraikinaren sarreran, sabaia erori zen larunbatean, nahiz eta gertakariak ez duen ondorio larririk izan, eta guztiak normaltasunez funtzionatzen jarraitu du azken egunetan.
Klinikatik bertatik adierazi dutenez, «noizbehinka obretan gertatu ohi den ezbehar horietako bat izan da; ez da erorketa handia izan, sabaiko zati bat soilik hautsi baita. Sartzean atentzioa deitzen du, baina ez da ezer larria izan. Orain konponketa lanetan ari dira, eta lehengo itxura bera berrartuko du». Sabaia osatzen duten plastikozko plaka zatiak dira erori zirenak, eta klinikatik baieztatu dutenez, hemendik aurrera obrek beren prozesua jarraituko dute.