Antolatzaileek azaldu dutenez, "oso ondo joan da bizikleta martxa". Alegiatik abiatu da martxa, gero Tolosako Zumardiaundian elkartu dira eta hortik Anoetara joan dira, ondoren Tolosara itzultzeko. "Gure helburua izan da jendeak jakin dezala martxoaren 8rako greba feminista antolatu dugula, hainbat ekintza daudela, eta animatu ditugu herritar guztiak gurekin parte hartzera", azaldu du Eli De Arriba Tolosaldeko Asanblada Feministako kideak.
Tolosako San Frantzisko pasealekuan informazio mahaia jarri dute eta jende ugari pasa dela azaldu dute. Bertan informazioa jasotzeaz gain, jendeak zapiak eta eskumuturrekoak eskuratzeko aukera izan du. Eman duten informazioetako bat greba feministan gizonek duten paperari buruzkoa izan da. "Gizon asko hurbildu dira jakiteko nola parte hartu behar duten greban. Lehenik eta behin esan diegu norberaren inguruan dauden emakumeei galdetzeko ea greba egiteko aukera duten, eta ezin badute, bere burua aurkezteko gizon bezala eginbehar horiek hartzeko. Inguruko emakume guztiek aukera badute greba egiteko, orduan atxiki daitezela gure grebara", azaldu du De Arribak.
Aurtengo grebaren gaia "oso zabala" izango dela azaldu du Idoia Bengoetxea Tolosaldeko Asanblada Feministako kideak. "Bost ardatz hartuko ditu: enplegua, kontsumoa, zaintza, pentsionistak eta ikasleak. Eremu asko hartzen ditu, guk uste dugulako emakumeen zapalkuntza beste hainbat zapalkuntzekin lotuta dagoela eta dena sistema heteropatriarkal kapitalistaren barruan dagoela. Guk eskatzen dugu bizitza erdigunean jartzea eta erantzukizun kolektibo bat hartzea bizitza sostengatzeko".
Martxoaren 8rako hainbat ekitaldi antolatu dituzte. 10:30ean kotxe karabana egingo da: eskualdeko hainbat herrietatik Tolosara joango dira eta bertatik abiatuko dira. 12:00etan manifestazioa egingo da Tolosan, eta arratsaldean hainbat ekintza egingo dituzte, tartean hitzordu garrantzitsuena izango den 19:00etako manifestazioa. Bestalde, bazkari autogestionatua ere egingo dute Zerkausian. Sare sozialen bidez egitaraua zabaltzen joango direla azaldu dute, eta herritar guztiei parte hartzeko deialdia egin diete. Horrez gain, hurrengo larunbatean, otsailaren 23an, informazio mahaia jarriko dute berriro San Frantzisko pasealekuan.