Tolosako Beotibar pilotalekuak itsura polita eskaini zuen larunbatean, Soroaren oroimenezko txapelketaren finalerdietan. Jubenilak hasi ziren lanean, eta Lasa-Cuairanek 22-16 irabazi zien Senar-Josu Etxeberria bikoteari. Partida gogorra jokatu zuten lau pilotariek, 43 minutura iritsi zelarik lehia. Partidaren lehen zatian berdinketak nagusitu ziren: 1-1; 4-4 eta 9-9. Ondoren, Lasa eta Cuairanek aurrea hartu zuten, 16-10eko zuloa zabalduz. Senar-Etxeberriak sakea berreskuratzea lortu zuten, ordea, eta markagailua ederki estutu zuten: 17-16. Tanto bolada hor amaitu zitzaien, irabazleak bost tanto jarraian eginaz 22ra eta finalera iritsi baitziren. Lasa izan zen partidako protagonista zazpi sake eta bi tantorekin.
Etorkizun mailako finalerdian Julen Egiguren-Apezetxea 22-9 nagusitu ziren Osa-Elizegiren aurka. Hasieran lehia orekatua izango zela zirudien, baina 5-4 edo 10-6etik 22-9ra joan ziren Egiguren eta Apezetxea. Aurrelariaren partida ikusgarria izan zen, bost sake eta 11 tanto lortu zituelarik.
Elite mailako finalerdian Ioritz Egiguren tolosarrak eta Zubizarretak neurtu zituzten indarrak aurreko koadroetan. Ataundarra nagusitu zen jokoan eta markagailuan. Zubizarretak 13 tanto egin zituen, horietatik lau sakez. Kaleak, berriz, bi bakarrik pilatu zituen. Tolosarrak zazpi tanto egin arren lau pilota galdu zituen. Amaieran, Zubizarreta-Uriondo 22 Egiguren-Sarasa 12.