Tolosako Udalak 850 eta 899 puntu artean eskuratu zituen, goi mailako ziurtagiria eskuratuz. Ebaluatzaileek hiru indargune nagusi identifikatu dituzte udalean puntuazio hori ematerako orduan.
Alde batetik, Euskararen Ordenantza indarrean izateaz gain, sail guztiei eragiten dien Euskararen Erabilera Normalizatzeko Plana eta hizkuntza irizpideak definituak dituela nabarmendu dute. Bestalde, lanpostu guztietan eskatzen da hizkuntza gaitasuna, egiaztatze maila altuarekin. Zinegotziak ere euskaldunak izateak lan hizkuntza euskara izatea errazten duela gaineratu dute. Azkenik, agirien estandarizazio prozesua hasi dutela azpimarratu dute behatzaileek.
Alkatearen iritziz, «euskararen erabileran udala bere osotasunean burutzen ari den lanaren errekonozimendua da».