Mugi Tolosa ekimenak bere V. edizioa abiatu zuen urrian eta asteazkenero, gazte zein heldu, Tolosan barrena ibilbideak egitera ateratzen dira. Ikasturteko lehen saio hauetan, bataz beste, ia 200 pertsona inguru atera dira astero. Orain, urtea amaitzear dela eta berria hastear, bigarrenez egutegi bat osatu dute. Ekimena gehiago ezagutarazi eta belaunaldi ezberdinen elkargune izateak duen aberastasuna bistaratzeko asmoa du ekintza txiki horrek. Guztira 1.000 ale kaleratu dituzte. 2018ko saio ezberdinetako argazkiek osatzen dute Mugi Tolosaren bigarren horma egutegia, protagonista parte hartzaile zein boluntarioak izanik. Hain zuzen, parte hartzaile guztien artean banatu zituzten atzo, egutegiak.
Udalak gogoratu du ekimena herritarrei zabalik dagoela, eta nahi duen orok duela ibilbide osasuntsu horietan parte hartzeko aukera. Asteazkenero biltzen dira, 10:30ean eta 11:00etan, Zerkausian.
Egun bakoitzean antolakuntza, elkarte ezberdinen eta udalaren artean elkarbanatu da. Aurten inoiz baino eragile gehiago dira Mugi Tolosaren parte, 17, udalarekin batera.