Gimnastek urte borobila egin dute, eta sekzio guztiak elkartzen dituen Tolosa CF-tik eskertzeko beharra ikusi dute: «Omenaldi honen bidez urteetan zehar lortutako emaitza onengatik eta oraindik lortzeko duten guztiagatik zoriondu nahi dira eta bide batez, gure Klubaren eta herriaren izena goreneko mailara eraman izana eskertu». Erregional Ohorezko Mailako Tolosa CF futbol taldekoek partida jokatu aurretik egin diete omenaldia.
Saroi Eskisabel, Joane Zugasti, Iratxe Martin, Irati Xiaoyan Agirre eta Anne Lizeaga izan dira omenaldia jasoko duten gimnastak. Hauen entrenatzaileen lana ere eskertua izango da. Arantxa Aristondo, Nerea Otaegi eta Sara Alonsok osatzen dute talde hori.
Gimnastek ere, esker hitzak agertu dituzte omenaldiaren aurrean: "Urte asko daramatzagu Espainiako txapelketetan lehenengo postua lortzen, eta gure herriaren aurrean, gure lagunen aurrean, eta familiaren aurrean horrelako zerbait egitea ohore handia da".
2013tik hona txapeldunen postuetatik jaitsi ere ez dira egin. "Beti punta-puntan ibiltzea ez da erraza, baina entrenamendu guztietan sartutako orduak ikusita, gustu handiz hartzen dira lehiaketetako emaitzak", adierazi dute.
2013 urtean, gimnasta talde hau Euskadiko txapeldun geratu zen, eta Espainiako txapelketan brontzea lortu zuten, oinarrizko haurren mailan. 2014an, Euskadiko eta Espainiako txapelketak irabazi zituzten maila berean. 2015ean, lorpen hori kadeteetan errepikatu zuten. 2016an, junior mailan, Euskadiko txapeldun geratu ziren. 2017an eta aurten, Euskadiko txapeldunak izan ziren, eta txapeldunordeak Espainiako talde kopan, seniorretan.
Garaipenen lista luze hori ez da lanik egin gabe lortzen: "Txikiak ginela hasi ginen entrenatzen. Asko gustatzen zaigun kirol bat da, eta azkenean entrenatzea hainbeste kostatzen ez zaigun arren, lan asko egin dugu". Horrelako kirol batek, gainera, punta-puntako lan taldea izatea eskatzen du, eta elkarren arteko harremana sendoa izateak laguntzen die. "Familia bat bezala gara, oso-oso ondo moldatzen gara eta ederki pasatzen dugu", diote gimnastek.