Argiteria konbentzionala, teknologia efizienteagoa duen beste batengatik aldatzeko lanean ari da Tolosako Udala. Besteak beste, Nafarroa Etorbidean, Kondeko Aldapan eta Bizkaia Kalean, egin dituzte aldaketak, LED teknologiadun farolak jarriz.
Bada, bi asteren buruan, Alde Zaharreko eta Berazubi auzoko lanparak aldatuko dituzte. Guztira, 79.995 euroko inbertsioa egingo du udalak, BEZa barne: 64.495 Alde Zaharrerako eta 15.500 Berazubirako.
Argiteriaren aldaketarekin, kontsumoa %75 murriztea aurreikusi du udalak, izan ere, egungo farola bakoitzaren potentzia 250 vatiokoa da, eta berriena 42 vatiokoa. Bestelako abantailak ere baditu LED teknologiak: ez dira erretzen, 70.000 orduko balio-bizitza dute farolek, 17 urterako argia izanik (urtero 4.000 argi ordu). Neke bisuala, itsutzeak eta argi arrotza ere ekiditen ditu.
Patxi Amantegi ingurumen zinegotziaren esanetan, «plan honek zuzenean eguneratze-teknologikoa, energia elektrikoaren kontsumoaren gutxitzea, atmosferara CO2ren igorpena gutxitzea eta mantenu-kostuen gutxitze nabarmena dakartza, hau da, efizienteagoa, jasangarriagoa, merkeagoa da eta argi kalitate hobea ditu».