Ziklikoa dela ere esaten da eta orain modan dagoena, datorren urtean zaharkitua geratu daiteke, baina ziur urte batzuk barru, bueltatu egingo dela. Horregatik da garrantzitsua soinean eramaten den hori kalitatezkoa izatea, behin eta berriz jantzita ere, iraungo baitu.
Moda aipatuta Paris, Milan edo New York-eko tendentziak jarraitu behar direla dirudi, are gehiago, hara joan behar dela modako azken joerak jarraitzeko, baina Tolosaldeak ere baditu hamaika aukera.
Eskualdean modari lotutako denda asko daude, ez bakarrik arropa saltokiak, baita ile apaindegiak, lurrin dendak edota azken joerak jarraituz, tatuaje estudioak. Hori guztia biltzen du Tolosaldeak, eta horren guztiaren eskaintza bildu nahi izan du TOLOSALDEKO ATARIAk, gehigarri honetan.
Modarekin bat joateko, tendentziak jarraitzeko edota estilo propioa eraikitzeko aukera zabala baitugu bertan, eta horrek badu bestelako onurarik ere; gertukoak diren profesionalak ditugula eskura, aholkuak eskatzeko, azken tendentzien inguruan galdetzeko edota besterik gabe, konfiantzazko giroan eskaintzen duten horren inguruko informazioa eskatzeko.
Hori da komertzio txikiek eskaintzen dutena, gertutasuna, zentzurik zabalenean. Bezeroak mimatzen dituztela diote, euren etxeetako ateak zabaltzen dituzte egunero, bezeroei irribarrerik zabalenarekin duten onena emateko.