Joan den igandean izan zen Indarkeria Matxistaren Aurkako Nazioarteko Eguna eta, aurrez iragarritakoa betez, hurrengo egunean, astelehenarekin, Tolosako ikastetxeek bat egin zuten, matxismoaren aurkako aldarriak plazaratzeko. Horrela, bada, Herrikide, Laskorain, Samaniego-Orixe, Inmakulada, Tolosaldea LHI eta HHI-EPA ikastetxeek kalejira osatu zuten, Zerkausiraino, eta bertan irakurri zuten adierazpen adostua.
Jarrera matxistak des(ikasi), berdintasunean ikasteko leloa izan zuten abiapuntu eta, besteak beste, emakumeak "uneoro" zapalduta daudela gaitzetsi zuten: "Ezin dugu beste aldera begiratu, hementxe bertan, zortzi orduz behin emakume bat bortxatzen dutela jakinda (...). Nazkatuta gaude gizonen itzalpean bizitzeaz, beldurrez bizitzea (...). Ez dago gure ahotsa isilduko duenik. Gora borroka feminista!".