Lehiaketa Trianguloa plazan izango da eta parte hartzaileek arau jakin batzuk jarraitu beharko dituzte. Izena emateko epea azaroaren 11n, igandea, bukatuko da eta kuota, bikoteko, 20 eurokoa izango da. Gehienez 28 bikotek hartuko dute parte eta bakoitzak kilo bat babarrun prestatu beharko du.
Tolosak Udalak larunbateko lehiaketan lehen saria jasotzen duenaren babarruna sukaldatuko dute parte hartzaileek. Nahi adina osagai erabili ahal izango dituzte baina babarruna izango da osagai nagusia. Erabilitako osagaiak nork bere kontu izango ditu.
Lehiakideek babarruna plazan bertan prestatu beharko dute 08:30etik aurrera, aurkezteko ordua 13:00etan izango delarik. Lehiaketan aurkeztutako babarrun platera sukaldariei itzuliko zaie epaia eman ondoren.
Izena eman duten lehiakide kopurua plaza kopurua baino handiagoa bada, aurreko urteetan parte hartu ez dutenak lehentasuna edukiko dute. Plazaren bat hutsik geldituz gero, zozketa egingo da Gure Kaiola elkartean, azaroaren 12an, 12:00tan.
Lehenengo postuan geratzen den bikoteak 400 euro, garaikurra eta txapela irabaziko ditu. Bigarrenarentzat, 200 euroko saria izango da, garaikurraz gain, eta hirugarrenak 100 euro jasoko ditu.