Doinu klasikoek markatutako saioa izan da larunbat goizekoa, lehen faseko lau saio puntuagarrietan azkena. Izan dira, hala ere, ezaugarri horietatik atera den ale solterik, baina orokorrean, erritmo moteleko emanaldia izan da. Horrek ez dio meriturik kendu, ordea, kalitatezko hiru abesbatzek eskainitakoari.
Convivium Singers (Londres - Erresuma Batua)
Alexander Normanen zuzendaritzapean, koru trinko baten itxura eman dute ingelesek. George Arthurek aurten konposatutako Basque Rosary hautatu dute euskaraz abesteko. Shenandoah edo Didn't my lord deliver Daniel? azken kantu modernoagoekin amaitu dute.
El Leon de Oro (Luanco - Asturias)
Uzkurtuta sartu dira asturiarrak oholtzara, baina minutuak pasa ahala, gehiagora joan dira eta euren ezaugarri nagusi den sendotasuna erakusteko gai izan dira. Bi euskal konposatzaileren abestiekin amaitu dute: euskarazko Bidasoa, Javier Bustorena, eta Josu Elberdinen Asturies, gaita eta guzti. Azken kantu honek jaso du goizeko txalo zaparradarik handiena.
Kammerchor Saarbrücken (Saarbrücken - Alemania)
Abesbatza alemaniar gehienek erakutsi izan duten seriotasun eta zurruntasun berberarekin abestu du Saarbrücken herriko abesbatzak. Euskaraz, Xabier Sarasolaren Neskatx' Ederra abestu dute. Koruko zuzendari den Georg Grünen Veni kantuarekin askatu dira gehien, piano, kontrabaxu eta bateriaren laguntzaz.