Argazkilari tolosarrak egunerokoan erabiltzen diren atsotitzak argazkitan bildu ditu bere azken liburuan. Atsotitzak Argazkitan, irudiak eta esaerak batean biltzen dituen bilduma bat baino gehiago da. Karrerak adierazi du "herriaren izaera eta jakinduria trinkoa islatu, eta freskotasuna ematen diguten esaera zaharrak" bildu dituela. Atsotitz asko gaur egungo bizimoduan zaharkituta gelditu direla dio argazkilariak. Horregatik, hizkuntza nolabait freskatzeko eta euskara ikasten ari direnentzako liburu hori sortzea erabaki du, erabilgarriak izan daitezkeen atsotitzekin. Aldi berean, “egunerokotasuneko egoerak erakusten dituzten” argazkiak esaerekin lotu ditu. 90 atsotitz eta 100 argazki inguru jaso ditu Karrerak lan honetan.
Karrerak Tolosako Lizardi Kultur Elkartearen babesa izan du. Elkarteak adierazi du nahiz eta kulturaren inguruan ekintza askorik ez egin, tarteka horrelako proiektuei laguntza ematen dietela. Lizardiren ardatzetako bi kultura eta euskara direnez, tolosar sortzaileei babesa emateko eta laguntzeko prest daudela diote.
Abenduan, 53. Durangoko Azokako auto-ekoizleen postuan liburua eskuragai egongo dela ziurtatu du, baita bere webgunean ere.