Larunbatean, 22:30ean, zuzeneko disko bat grabatuko du Pettik, Tolosako Bonberenean emango duen kontzertua aprobetxatuz.
Hain zuzen, hamar urte igaro dira era horretan grabatu zuen aurreko diskotik: Awañak. Rafa Acebes pianistarekin batera, 17 abestiko diskoa grabatu zuen Bonberenean bertan, hil berria zen aitari eskainia.
Gerora disko gehiago argitaratu dituen arren, zuzeneko lan berria argitaratzeko berriro ere Bonbereneara itzuliko da Berako bakarlaria. Urteotan sortu dituen edo bere egin dituen ale kuttunenak aukeratu ditu diskoa osatzeko, erraietatik.
Amerikar sustraiak dituen rocka egiten du Pettik. Sei bakarkako disko plazaratu ditu, baita Anari, Txuma Murugarren, Rafa Rueda, Xabi Garre (Señor No) edota Barrence Whitfield kantariekin partekatutako beste hainbat ere. Erraietatik ateratzen den ahots urratu eta sakona da bere ezaugarri nagusia, bluesaren arimaz kutsaturiko kantu ezkor eta ilunak, gitarra jotzeko trebezia eta taula gaineko indarrarekin batera.
Gaur, Broken Brothers Brass Band
New Orleanseko doinu garaikideak, Funka, gospela eta jazz modernoa uztartzen dituen Broken Brothers Brass Band taldeak emango du, gaur, kontzertua Bonberenean. Emanaldia 22:30ean hasiko da.
Bi kontzertuetako sarreren prezioa zortzi eurokoa da.