Stopr Sanfilippo, Agestta, Pausoka eta Zutani elkarteak lagundu izan ditu, azken urteotan, Tolosako elkarteen estropada solidarioak. Aurten ere, elkartasun helburuz bat egin, eta Oria ibaian batelen lehia izango da, larunbatean, Tolosaldea Sahararekin elkarteari bultzadatxoa emateko. Atzo aurkeztu zuten hitzordua, Zerkausi azpian, eta datorren larunbaterako xehetasun guztien berri eman zuten.
Arraunean ariko diren gehienak uztailean hasi ziren arraunean ikasten, alan lehenengo, eta batel balantzatsuetan gero: "Asteroko martxan, azkenean, oso giro polita sortzen da elkarteetako kideon artean eta, elkartasun helburuarekin batera, gure arteko harremana sendotzea ere lortu nahi dugu", azaldu zuen Iñigo Gorostiaga Emendek elkarteko kideak.
Estropada 11:00etan hasiko da, eta azken urteotako sistemari helduko diote larunbatean ere: talde bakoitzak bi txanda jokatuko ditu, kale bakoitzetik bat. Guztira, sei batel ariko dira lehian, eta bi denborak batuta markarik onena eskuratzen duten bi taldeek jokatuko dute finala. Aipatzekoa da, txanda arruntak Zubi Berritik hasiko dira, eta bi ziaboga emanda amaituko direla Zerkausian. Finala, berriz, ziaboga bakarrera jokatuko dute. Horretarako guztira, elkarte antolatzaileek ezinbestekoa izan dute Tolosaldeko Arraun Klubaren laguntza. Honakoak izango dira txandak:
-
1.kalean
2.kalean
1. txanda
San Esteban
Lizardi
2. txanda
Emendek
Udaberri
3. txanda
Batasuna
Txinparta
4. txanda
Lizardi
San Esteban
5. txanda
Udaberri
Emendek
6. txanda
Txinparta
Batasuna
7. txanda
Finala
Finala
8. txanda
Finala
Finala
Batelak uretan ari diren bitartean, herritarrek aukera izango dute estropada jarraitu eta Zerkausian mokadutxo bat egiteko, Aiz Orratz eta Oargi elkarteko kideen eskutik. Gainera, Udaberriko fanfarreak girotuko du batelen lehia, eta baina bazkal aurreko nahiz arratsaldeko giroa ere.
Izan ere, herri bazkariak hartuko du Zerkausia, eguerdian. Elkartasun estropadan parte hartuko dutenekin batera, herritarren aukera izango dute herri bazkarian otordua egiteko, eta hilaren 12a izango da horretarako azken eguna.
Elkartasun estropadako argazki eta albisteak ikusgai izango dira, larunbatean, ataria.eus webgunean.
Aldarri sozial eta politikoak
Tolosaldea Sahararekin elkarteko kideek ere parte hartu zuten estropadaren aurkezpenean, eta esker hitzak eskaini zizkieten elkarteei. Azaldu zuten, urteak daramatzatela Oporrak Bakean proiektuan parte hartzen, Saharar kanpamenduetako haurrek uda samurragoa pasatu dezaten. Horrez gain, ordea, eskola bat sortzen eta hornitzen dihardute azken urteotan.
Tolosaldea Sahararekin elkartearen aldarriak soziala eta politikoak direla azpimarratu nahi izan zuten. Sozialak, "Saharar herriak bizi-baldintza duinagoak behar dituelako" eta politikoak, "Marokok sahararrak beren lurretatik bidali zituztelako, askotariko armak baliatuz, eta hamarkadak daramatzatelako jazarrita eta kanpalekuetan bizitzen".