75 urtek, askotarako eman dezakete. Urdina-Txiki Kirol Taldea, Urdina Txiki Elkartea bezala ezagunagoa, 1943an, Tolosan antolatu zen txapelketa batean hasi zen, futbol talde bat bezala, bere lehen urratsak ematen. Ofizialki, baina, urte bereko abenduaren 5ean sortu zen taldea, Manuel Goicoechea lehendakari zuela.
Orduz geroztik, bertan aritutako jokalarien zerrenda luzea da, eta asko, Tolosa CF-eko lehen taldera ere iritsi ziren bertatik. Horrez gain, Estatu mailan nahiz nazioartean jokatzera ere heldu zen bakarren bat; besteak beste, Periko Alonso, Xabi eta Mikel Alonsoren aita. Bestetik, 1972-1973 denboraldian, Jubenil kategoriako bigarren mailan, Gipuzkoako txapeldun izan zen Tolosako taldea.
Guzti hori dela eta, taldea sortu zela 75 urte betetzen direnean, omenaldi berezi bat egin nahi izan dio, Tolosa CF-k. Izan ere, bihar arratsaldean, futbol partida berezi bat jokatuko dute, Berazubiko futbol zelaian, Nazional mailan ariko den klubeko jubenil taldeak, eta maila bereko Azpeitiko Lagun Onak taldeek. 11:00etan hasiko da partidak, herriko jubenil mailako futbolarekin lotura estua izan duen Urdina Txiki elkarteari, eskerrak emateko balioko du.
Bazkideen ezohiko batzarra
Tolosa CF-tik, bestalde, ezohiko batzar orokor bat ospatuko denaren deialdia zabaldu nahi diete bazkideei. Bilkura, irailaren 3an izango da, kultur etxeko areto nagusian. Lehen deialdia, 19:00etan izango da, eta bigarrena, berriz, 19:30ean. Bertan, besteak beste, Berazubi futbol zelaiaren moldaketen inguruan, 2011ko martxoaren 31n, klubak, Tolosako Udalak eta Miguel Muñoa Fundazio Ongile Partikularrak sinatuko hitzarmenean aldaketak egingo dira, bazkideek hala nahi izanez gero behintzat. Amaieran, galderen eta eskarien txanda helduko da.