2016ko San Ferminetan gertatutakoa, «zalantzarik gabe, bortxaketa» izan zela aldarrikatu dute ehunka herritarrek gaurkoan ere. Jende ugari bildu da, eguerdian, Tolosako Plaza Zaharrean.
Gizartearen antzera, justizia ere «matxista eta patriarkala» dela salatu dute: «Argi dago ez dituela emakumeon askatasuna eta bizitza babesten. Epaituak izateko beldurra sartzen diguten bitartean, bortxatzaileei inpunitatea eskaintzen diete. Zergatik? Sinplea da, ahal dutelako», adierazi dute.
Instituzio, eragile eta norbanakoei ere konpromisoa eskatu diete, «guztia zeharkatzen duen akordio patriarkala hausteko. Ez dugu gure borroka diskurtso zigortzaileak indartzeko erabili nahi».
Txalo zaparrada luze eta danborren burrunba ozen batekin eman diote amaiera elkarretaratzeari. Ondoren, kalejira egin dute batukada feministarekin, aldarria festa girora ere zabalduz.