Ikasturtea itxi berri dute kultur etxeko ikastaroek. Guztira 410 pertsona aritu dira 10 ikastarotan banatuta. Gora egin du zifra honek aurten, %5 hain zuzen. Balleta izan da arrakasta gehien izan duen ikastaroa, erdia baino gehiago aritu baita dantzan. Pinturan 79 pertsona aritu dira, antzerkian 27, zeramikan 24, ehoziriak egiten ikasten 16, eskulan tailerrean 13, argazkigintzako hastapen eta praktika taldeetan hamarna, idazle ikastaroan beste hamar, eta dantza garaikideko ikastaroan zazpi.
Arrakastatsuak izan dira dantza eta antzerki tailerretako kurtso amaierako ikuskizunak, eta orain, gainerako tailerretako lanak herritarrei erakusteko asmoz erakusketa antolatu dute, Aranburu Jauregian.
Tailerrek ematen duten «gizarteratzeko aukera» azpimarratu du Nuria Carbonell kultur zinegotziak erakusketaren irekiera ekitaldian: «elkargune dira, lagunak egin eta ikasteko aukera ematen dute, eta are aberatsago dira, talde lanaren balioa gehitzen baitzaio. Ezinbestekoa da sorkuntzari bere lekua ematea eta horrelako ikastaroak babesten jarraituko dugu».
Erakusketa Aranburu Jauregian egongo da ikusgai uztailaren 6a arte, asteartetik larunbatera, 17:30etik 20:30era.
