Babarruna erein dute Samaniego Ikastetxeko, Herrikide Ikastetxeko eta Laskorain Ikastolako gaztetxoek, herriko sukaldarien, udal ordezkarien eta Tolosako Babarruna Kofradiako kideen laguntzarekin.
Emeterio Arresen egin izan dute urtero ekitaldi hori, baina eguraldiaren ondorioz, Zerkausira lekualdatu eta beste modu bat inprobisatu behar izan dute. «Aurten ez dago soroetan sartzetik, putzu eginda daudelako. Era modernoago batean egin dugu aurtengoan ereitea». Mari Karmen Iradi Babarrun Elkarteko kidearen hitzak dira.
Baina eguraldiak ondorio gehiago ekarriko ditu, uzta atzeratuko baitu Iradiren esanetan: «Hotz egiten du oraindik, eta atzerapen handia izango dugu. Beranduago jasoko dugu aurtengo uzta. Ea udara eta udazkena nola doazen».
Bide horretan, desio bat du Koldobika Artola, elkarteko kide eta nekazariak: «Garrantzitsua izango da udan euri pixka bat egitea, alea gizendu dadin, baina udazken lehorra beharko dugu, hego-haize askokoa, ale horien ondo sikatzeko».
Eguraldien ondorioei aurre egiteko, aurten takotan ereingo dute babarruna: «Lan gehiago izango da, baina zertxobait aurreratu genezake horrela», azaldu du Iradik.
Bestalde, Tolosako Babarrunaren Kofradiak aurtengo spota aurkeztu du. #EreinGureaDena leloa aukeratu dute aurtengo sasoirako, azaldu dutenez, gaurkoan ez dutelako ale bat bakarrik erein: «Tolosarron balioak erein ditugu, alea ez baita, soilik, ale bat bere horretan. Alea konpainia da, bazkalondoa da, bertakoa eta jasangarria. Alea kultura da, Tolosa da, amona da. Alea zu eta ni gara».