09:30etik aurrera ligaxkako partidak jokatuko dira, eta arratsaldean, final-laurdenak, finalerdiak eta finala. Azken partida hau 18:00ak inguruan hastea espero dute antolakuntzatik. Ondoren, sari banaketa ekitaldia egingo dute.
Tolosa CF-k antolatzen du futbol txapelketa, Urtzi Gurrutxaga kapitainaren omenez. Aurten lau talde berri izango direla iragarri dute: Bergara, Urola, Aretxabaleta eta Beti Kozkor. Horiez gain, azken urteetako hamabiak izango dira lehian: Tolosa CF bi talderekin, Real Sociedad, Ordizia, Martutene, Beasain, Euskalduna, Hondarribia, Lazkao, Athletic, Venta de Baños eta Zarautz.
Talde guztiek Berazubi bertan bazkalduko dute, 16:00etan txapelketaren azken faseari ekin aurretik.
Gonbidapena
Txapelketaren aurkezpen ekitaldian Tolosa CF-ko Haritz Doyharzabal eta Ruben Garcia egon dira, zuzendaritza eta lehen taldea ordezkatuz. Biek ekainaren 16an Tolosara etorriko diren alebin taldeen maila azpimarratu dute: «Lehia eta egun oso polita izaten da. Urtzi horrela oroitzeak merezi du. Beraz, guztiak gonbidatzen ditugu larunbatean Berazubira».
Tolosako Udalaren izenean Christian Fernandezek eta Patxi Amantegik hitz egin dute. Venta de Baños talde palentziarraren presentzia bi herrien arteko kirol senidetzean oinarritzen dela esan dute. Herritarrak txapelketara gonbidatzearekin batera, kirolaren balioaz hitz egin dute: «Balore asko lantzen dira taldekako kirolean. Ondorioetako bat atxikimendua da. Taldekide baten galeraren aurrean, elkar hartuta aurrera egitea. Heziketa da hori, askotan aipatzen ez dena eta kirola emaitzak bakarrik ez direla azaltzen duena».