Jendetsua izan da gaur eguerdian Tolosa gurutzatu duen manifestazioa. Duintasuna Tolosaldeko Pentsiodunen Elkarteak egin zuen deia, baina manifestazioan ez dira pentsiodunak bakarrik egon; gazte ugari gerturatu dira ere eta hainbat elkarte, alderdi politiko, gazte asanblada eta aisialdi talderen atxikimendua ere jaso dute. Manifestazioa hasteko eta bukatzeko bertsoak bota dituzte eta mobilizazioaren buruan dultzaineroak joan dira, bidea irekiz.
Taldeko Maria Luisa Lizarzak eta Iñaki Elduaienek esan dutenez kontentu daude martxotik hona egin duten ibilbidearekin. "Atsedenaldia hartuko dugu eta iraila edo urrian bueltatuko gara", esan dute. Gaia, dena den, pentsiodunetatik harago doala gogoratu nahi izan dute: "Gizarte osoari eragiten dion gaia da hau eta horregatik egin ditugu harremanak Tolosaldeko hainbat eragilerekin. Asko etorri dira eta oso pozgarria da", esan dute.
Era berean, pentsiodunen artean emakumezkoek kalte bikoitza jasaten dutela nabarmendu dute, 600 eurotik behera kobratzen dutenen %77 emakumezkoak direla gogoratuz. "Oso pozgarria da emakumezko asko bildu garelako gaur hemen", gaineratu dute.
