Olatz Peon Tolosako alkateak eta Xabier Saizar Galtzaundi Euskara Taldeko lehendakariak gaur sinatu dute, bi erakundeen arteko hitzarmenaren berritzea. Urtebeteko epea izango du akordioak, eta euskararen normalizazio jardueretarako diru laguntza eta baliabideak eskainiko dizkio, udalak, Galtzaundiri.
Horrela, egiteko zehatzak txertatu dituzte hitzarmenean eta, besteak beste, herriko eta eskualdeko eragileen antolaketa eta koordinazioa, Euskarak 365 egun markoa garatzea, eskualdeko egoera soziolinguistikoaren analisiak egitea, euskaltzaleen komunitatea lankidetzaz trinkotzea eta euskalgintzaren jardueren ikusgarritasuna lantzea izango dituzte jomugan.