Atzo arratsaldean banatu zituzten CAF-Elhuyar sariak, Tabakalerako Kutxa Kultur Plazan (Donostia). Egin jauzi, eta sortu uhin hedakorrak lelopean, zientzia eta teknologia gizarteratzeko ahalegina egiten duten pertsonen lana aitortu zuten sariketa honekin.
Aurten 71 lan jaso eta aztertu behar izan ditu epaimahaiak, eta banatu dituzten bost sarietako bat eskualdera iritsi da. Zientzia-kazetaritzaren arloko lanen mailan, Josu Lopez-Gazpio kimikari tolosarrak irabazi du. Gabonen aurretik Zientzia Kaieran argitaratu zuen Gabonetako oporraldiak osasunean duen kaltea.
Lopez-Gazpio kimikan doktorea da, eta lan handia egiten du dibulgazioan. UEUko Kimika sailburua da, besteak beste, TOLOSALDEKO ATARIAren kolaboratzaile da, kimika kontuen berri emanez.
Dibulgazio-artikulu orokorraren saria Alaitz eta Iraia Etxabide Etxeberria ahizpa lesakarrek irabazi dute, Irtenbide zirkularra, mundua irensten ari den nonahiko zaborraren kontra izeneko artikuluarekin. Plastikoen arazoari aurre egiteko irtenbideak ikertzen ditu Alaitzek, eta idatzi duen artikulurako ilustrazioak egin ditu Iraia ahizpak.
Egilearen doktore-tesian oinarritutako dibulgazio-artikuluaren saria, berriz, Miguel Querejeta López donostiarrak eskuratu du, Zulo beltzen sinfonia lanarekin. Zulo beltz erraldoien eta galaxien arteko elkarrekintzari buruz egin du tesia Querejetak, eta egun Max Planck Astrofisika Institutuan dabil ikertzen.
Lehen sektoreko lanak saritzen dituen Neiker Sari Berezia Iñaki Odriozola Larrañaga zestoarrak irabazi du, Euskal mendiak herbiboroek zizelkatuak lanarengatik.
Elhuyar Fundazioaren Patronatuak Elhuyarren Merezimendu Saria ematen du, euskara normalizatzen eta zientzia gizarteratzen egindako lana aitortuz. Aurten 30 urteko ibilbidea duen Ekaia EHUko Zientzia eta Teknologia aldizkariarentzat izan da.
5.000 euroko diru-laguntza bat ere ematen du CAF-Elhuyar sariketak, zientzia eta gizartea uztartzen dituen proiektuak laguntzeko. Arkitekturaren gaineko gogoeta eta teknologia bateratzen dituen Ander Gortazar Balerdi donostiarraren eta Jacek Markusiewicz poloniarraren Bastark! proiektuak irabazi du aurten.
