Parkeetan lurrean margotutako jokoak jartzea da hurrengo eskaera

Tolosaldeko Ataria 2018ko mai. 12a, 19:31

Haurren Hiria egitasmoaren ikasturte honetako azken saioa egin dute gaur, Zerkausian. Belaunaldien arteko trukea izan da aurtengo gaia, eta adinekoek gimnasia egiteko dituzten espazioetan lurrean jokoak margotzea eskatu diote haurrek udalari.

Eskaeraren helburua helduek haurrekin batera egon eta jolastea da, eta Alondegiko parkean lurrean jokoak margotzea izan da zehazki eskaria. Gaurko saioaren bidez, udalari jakinarazi diote haurrek aurten egindako lanketa. Zerkausian elkartu direnak, haur, heldu eta udalbatzako hainbat ordezkari, jokoetan aritu dira. Bestalde, emanaldi bat egin dute haurrek, eta ikus-entzuneko bat jarri dute Haurren Hiria egitasmoarekin urte hauetan zer egin den eta zer lortu den erakusteko. Txokolate jatearekin eta dantzarekin bukatu dute saioa.

Margi Iturriza Haurren Hiria egitasmoaren arduradunetako batek azaldu duenez, gaurko saioaren bidez erakutsi da "haurrek eskatutako hainbat gauza gauzatu direla. Iaz izan zen tirolinaren eskaera, eta hori jarrita dago. San Joan Su Txikia ere izan zen Haurren Hiritik ateratako beste ekintzetako bat, eta aurten eskakizuna izango da parkeetan lurrean margotutako jokoak jartzea". Lau urte daramatzate Tolosan Haurren Hiria egitasmoarekin gai ezberdinak jorratzen, eta asmoa da "haurren ikuspegitik Tolosa hobetzea", esan du Iturrizak.

Bost saio egin dituzte ikasturte honetan haurrekin, eta horietako batean gurasoekin batera aritu ziren haurrak. 42 haurrek hartu dute parte egitasmoan, herriko hiru ikastetxeetakoak, eta hirugarrenetik seigarren mailara bitarte.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!