Tolosako babarrunaren zaporea ezagutu dute Italiako 30 ikaslek

Tolosaldeko Ataria 2018ko api. 12a, 10:50

Pollenzo (Italia) hiriko Università degli Studi di Scienze Gastronomich unibertsitateko 30 ikasleren bisita jaso du Tolosako Babarrun Kofradiak.

Gastronomia Zientzien Masterreko ikasleak Euskal Herriko gastronomia ezagutzeko asmoarekin, Tolosa hautatu dute haien gastronomia-birako geraleku. Apirilaren 7an ekin zioten bidaiari, eta gaur itzuli dira, astebete ondoan, italiar lurraldera.

Kasino elkarteko mahaien bueltan bildu ziren herenegun, jatorri ezberdinetako ikasleak: AEB, Israel, Herbehereak, Errusia, Alemania, Brasil... Lehenbizikoz izan zuten babarrun zaporearen berri, baita Idiazabalgo gaztaren, Beasaingo odolkiaren, eta Tolosako teilak eta zigarrilloenaren berri, besteak beste.
Halaber, mahaikide izan zen Fecoga Kofradia Gastronomikoen Federazioko ordezkari den Juan Manuel Garmendia.

Kofradiaren esanetan, halako bisitek "ikaragarri aberasten dute bai Tolosa, eta bai euskal gastronomia ere. Sinergiak eta harremanak zabaltzeko irrikan da Tolosako Babarrunaren Kofradia. Gure Estatutuetan ederki asko jasotzen da Tolosako kofradiaren funtsa; alegia, Tolosako babarruna ezagun egitea ez soilik Euskal Herrian, baita mundu osoan ere. Eta horretan gabiltza".

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!