Donostiako Udaleko Euskara Zerbitzuak eta Donostia Kulturak euskarazko antzezlan bati egiten dioten aitortza da Donostia Saria. Aurten, Mami Lebrun antzezlanak jaso du errekonozimendua, epaimahaiaren iritziz, "ikuslea hunkitzea" lortu duelako antzezlanak, eta "diziplina asko uztartzen asmatu" egin dutelako.
Xake produkzioak konpainiaren antzezlana da Mami Lebrun. Topic zentroan estreinatu zen, 2016ko maiatzean; Xabi Ormazabal tolosarrak eta Tolosan bertan bizi den Kepa Errasti aretxabaletarrak sortu zuten konpainia, 2015ean.
Atzo jaso zuten Chari Goienetxeak egindako artelana eta 10.000 euroko saria, Donostiako Viktoria Eugenia antzokian egindako ekitaldian. Ondoren, antzezlana eman zuten. Sariaren gainerako 2.000 euroak jasotzeko, 2020. urtea bukatu aurretik euskarazko antzerki lan bat eskaini beharko du konpainiak Donostian.