Tolosako Herrikide Ikastetxeko langileen gehiengoak bat egin du Gizarte Ekimeneko itunpeko ikastetxeetan deitutako grebarekin. Gutxieneko zerbitzuak eskaini dituzte, Haur Hezkuntzan, Lehen Hezkuntzan, DBHn eta batxillergoan; haur eskolak, ordea, normaltasunez egin du lan.
Kristau Eskolako eta IZEA, Irakaskuntza Zentroen Elkarte Autonomoko 180 ikastetxetako 10.000 langile inguru zeuden deituta gaurko grebarako. Ia 118.000 ikasleri ematen diete zerbitzua. Ikastolen Elkarteak, aldiz, ez du bat egin deialdiarekin.
Sindikatu deitzaileen arabera, %70eko jarraipena izan du grebak. Goizean, manifestazioak egin dituzte EAEko hiru hiriburu nagusienetan, Donostian, Gasteizen eta Bilbon, lan hitzarmen berria aldarrikatzeko.
Hain zuzen, 2009koa da sektoreko azken lan hitzarmena. "Geroztik, inposatutako murrizketei aurre egin behar izateaz gain –%5eko soldata murrizketak eta estatuko hitzarmenaren inposizioa– ia 10 urte luzez akordio baten alde negoziatzen izan gara. Patronalak negoziazioa etengabe luzatzeko jarrera du, eta ez du akordiorako borondaterik", azaldu dute sindikatuek.
Hori horrela ikusita, gutxieneko aldarrikapenak modu bateratuan jorratuko zituen plataforma bat jarri zuten martxan sindikatu guztiek, irailean. Erantzuna, ordea, "eskasa" izan zela diote, horregatik negoziazio mahaitik altxa eta mobilizazioak hasi zituzten.
"Beharrezkoak diren hobekuntzak jasoko dituen akordio bat" eskatzen dute sindikatuek: "Sektoreko arazo larrienetako bat lan kargen hazkundea da, ordu osagarriak berez direnerako ezin erabili izatea edota etxean egiten den lanaren aitortza eza".
Jaiotza tasaren jaitsierak ere ondorio negatiboak eragin dituela azaldu dute sindikatuek: "Hezkuntzako lehen etapetan gelak galdu dira eta kaleratzeak izan dira". Horren aurrean, enpleguaren mantenurako plan bat proposatu diote patronalari, ordezkapen poltsa gardena eta objektiboa osatuz.
Urte hauetan sektoreko langileen eroste ahalmena %13,6 murriztu dela salatu dute. "Baldintza prekarioetan lan egiten duten Haur Hezkuntzako lehen zikloko eta Hezkuntza Laguntzako Espezialisten lan baldintzak duintzea ere lehentasunezko gaia da", azaldu du ELAk.