Imanol Rojo eta Marti Vigo taldekako esprint probako finaletik kanpo geratu dira Neguko Olinpiar Jokoetan. 16:59,38ko denbora egin dute, eta 10. postuan sailkatu dira euren finalerdian. Beste finalerdia kontuan hartuz gero, ordea, parte hartu duten 28 bikoteen artean 19. izan dira, finaleko postuetatik urrun.
Hamar bikote sailkatu dira finalerako. Txekiar Errepublikako taldea izan da txartela lortu duen azken taldea, 16:08,78ko markarekin.
Sare sozialetan jakitera eman duenez, eta finalera sailkatzea lortu ez duten arren, Rojo "gustura" geratu da lortutako emaitzarekin eta, batik bat, egindako lanarekin. "Hurrengo proba presatzea baino ez zait geratzen", aitortu du.
Gaurkoa Pyeongchangen jokatu duen hirugarren proba izan da Rojorentzat, eta beste bat gelditzen zaio: estilo klasikoko 50 kilometrokoa. Iraupen eskiko probarik gogorrena da, eta larunbatean jokatuko du.